Me poezi kundër dhunës ndaj gruas, të pranishëm Fahredin Shehu e Naser Dula

Koordinatorja e Festivalit Ndërkombëtar të Poezisë për Kosovë, Ilire Zajmi Rugova, ka deklaruar para të pranishmëve se britma e gruas është e dizajnuar të nderoj figurën e gruas dhe të përdorë poezinë që të dëgjohet zëri i saj kundër dhunës, shkruan KultPlus. “Heroinat”, ka qenë tema kryesore e aktivitetit letrar të sivjetmë “Britma e Gruas” që është organizuar të mërkurën në mesditë në kuadër të Festivalit Ndërkombëtar të Poezisë të Lëvizjes “Mujeres Poetas Internacional”, me seli në Republikën Dominikane. Heroinat nuk janë mite të krijuara, por janë gra shqiptare, kjo ka qenë njëra ndër mesazhet kryesore në këtë aktivitet poetik që mbahet për çdo vit të datës njëzet e gjashtë të muajit mars, në gjitha qendrat kryesore të botës, e që po ashtu është organizuar edhe në Prishtinë, ku në të kanë lexuar poezi disa poet të njohur të vendit Naser Dula në kitarë si dhe me flaut Yllka Simnica nga Shkolla e Muzikës “Vihuela”, kanë shoqëruar me tinguj muzikor gjatë tërë kohës poetët që kanë lexuar poezi për dashurinë dhe njëkohësisht vuajtjet e gruas, ndërkohë në prapavijë të poetëve ishte vendosur një video-projektor ku në të shfaqeshin portretet e grave shqiptare që kishin lënë gjurmë në disa fusha jetësore siç ishin: Marie Shllaku (veprimtare kombëtare), Katarina Josipi (aktore), Marie Kraja (këngëtare operistike), Liza Vorfi (aktore), Irena Papas, Shote Galica, Safor Marko, Tinka Kurti e shumë të tjera. Pas saj, me poezi në këtë aktivitet janë paraqitur edhe Qibrije Demiri Frangu, Ibrahim Kadriu, Shukrije Gashi, Arif Bozaxhe, Fahredin Shehu, Burbuqe, Rushiti, Jeton Kelmendi, Eli Krasniqi, Mirlinda Koxha dhe Vjosa Osmani Maqedonci. Festivali Ndërkombëtar i Poezisë është themeluar nga “Mujeres Poetas Internacional”. Ky festival për herë të parë nisi në Republikën Dominikane dhe mbahet çdo vit në muajin mars në shtetet të ndryshme të botës. Aty mblidhen shkrimtarë, poetë, artistë, muzikantë duke bashkuar gratë dhe burrat me qëllim që përmes arti të dëgjohet zëri i femrës./RahovecPress/