Friday, March 15, 2013

DHURATE



DHURATA


Për fundvit mos më blij unazë diamanti

parfum me erë qershie biletë për një udhëtim ëndërrash

Dua të më dhurosh  Kohën

Pak kohë të marrë frymë një grimcë kohe të buzëqesh

Të mbyll sytë e të udhëtoj në një tjetër botë   

Më nevojitet pak kohë të arratisem të qaj ngeshëm

të shoh qiellin e përflakur mjegullnajën sipër qytetit pa shpirt 

Se di si u katandis koha ime

  rrugët e pista gotat e zbrazura kafeneve të mykura 

Në pako cigaresh muhabete të panjohurish  


Nëse do të më bësh një Dhuratë

Më fal pakëz  kohë një orë një minutë pak sekonda vetëm një çast

Të bëhem njësh me gazin e një fëmije

të puth me buzët e etura të një të dashuruare 

Jam mbretëreshë e shfronëzuar bjerrakohëse 

Mos më sill as lule as libra 

Në do të më dhurosh diçka më dhuro pak kohë

E nëse se gjen askundi për t’a blerë 

Grabitja atyre që shesin gjakun me këste trupin me fajde

Vidhjau atyre që iu tepron së shijuari bota nga mërzia    

Atyre që vrasin miza e pështyejnë veten në fytyrë 

Nëse do të më japësh frymë më dhuro KohëN

Ajo është gjithçka që vdekatarët kanë!   

Wednesday, March 13, 2013

Gratë luftojnë dhunën me letërsi


Drilon Pulaj Publikuar: 13.03.2013 - 10:18


Ato ishin ulur të gjitha në qendër të amfiteatrit të vogël në Bibliotekën Kombëtare dhe Universitare të Kosovës, kur papritmas u dëgjua zëri i aktores Anisa Ismaili, e cila recitoi poezinë kushtuar gruas së parë, Evës. Poezia e saj tregonte fuqinë mbizotëruese të burrit dhe sakrificat e gruas, dhimbjet e lindjes të cilat nuk i përjeton burri. Interpretimi skenik i aktores u përcoll me pikolo nga Lule Ballata, e vetmja instrumentiste e këtij lloji ne Filarmoninë e Kosovës.
Organizatorja e manifestimit “Britma e Gruas”, shkrimtarja Ilire Zajmi, në emër të PEN Qendrës, tha se ky është një aktivitet që mbahet në kuadër të Festivalit Ndërkombëtar të Poezisë, të Lëvizjes Ndërkombëtare të Grave Poete. “Ky organizim ka tri vite që mbahet në shtete të tjera të botës, ndërsa në Kosovë është hera e dytë që e organizuam këtë aktivitet në kuadër të Festivalit”, ka thënë Zajmi. Ajo ndër tjerash tha se qëllimi i këtij aktiviteti ka për synim të nxjerrë në pah pikëpamjen tradicionale të grave, avancimin e zërit femëror dhe luftimin e dhunës ndaj gruas: “Festivali ka për qëllim avancimin e letërsisë femërore, fuqizimin e zërit femror në letërsi, gjithashtu edhe mënyrën e trajtimit të gruas në përgjithësi”, ka shtuar Zajmi.
Ndërsa, poeteshat, figura të njohura nga fusha të ndryshme, ndër të cilat disa anëtare të PEN Qendrës së Kosovës, lexuan poezitë e tyre me të cilin zë a “britmë” thirrnin për jetën e veprimtarinë e gruas. Femra e parë akademike në Kosovë, Edi Shukriu, para leximit të një poezie të saj, që trajtonte gjendjen sociale, tha se situatën e femrës në Kosovë e di secila femër, sepse e ndjen në lëkurën e saj, dhe që shpreson që gjërat të shkojnë në drejtim më të mirë. Pos Shukriut, Lindita Tahiri, Naime Beqiraj, Shukrije Gashi, Xheraldina Vula, Kujtim Paçaku, Blerina Rogova-Gaxha, Nerimane Kamberi, Trina Gojani, Fahredin Shehu kanë sjellë një lloj revolte ndaj gjendjes së femrës kosovare dhe lirive që posedon ajo, secili në mënyrën e tyre.
Ndryshe nga kjo, Ilire Zajmi tha se ky edicion i kushtohet aktivistes pakistaneze 15-të vjeçare, Malala Yousafzai, posteri i së cilës ishte i vendosur në prapavijën e britmave të grave poete. “Malala është një aktiviste pesëmbëdhjetë vjeçare, e cila lufton për të fituar të drejtën e saj për shkollim. Përmes peticioneve të shumta, Lëvizjes Ndërkombëtare të Grave Poete, ka arritur që ta nominojë aktivisten e re për çmimin Nobel për paqe”, tha Ilire Zajmi. Ndonëse aktiviteti ishte paraparë si një lloj debati për zërin e femrës në letërsi, të ftuar të diskutojnë, të pranishmit dhe pjesëmarrësit dukej se nuk kishin shumë për të debatuar për temën.

BRITMAT E POETEVE


Nga Alfred Beka 13 Mars 2013 08:19



Poetet kosovare zhvilluan për herë të dytë aktivitetin ‘Britma e gruas’. Aktiviteti ka për qëllim avancimin e letërsisë së shkruar nga gratë dhe luftimin e dhunës ndaj tyre.

Dhuna ndaj gruas bëri që poetet ta ngrehin zërin e tyre, madje edhe të bërtasin. ‘Britma e gruas’ u emërtua aktiviteti që u organizua të martën, në Bibliotekën Kombëtare dhe Universitare të Kosovës, në Prishtinë, si pjesë e Festivalit Ndërkombëtar të Poezisë të Lëvizjes Ndërkombëtare të Grave Poete.
Temë e festivalit ishte pikërisht dhuna ndaj gruas. U tha edhe se synim i festivalit është avancimi i letërsisë së shkruar nga gratë, fuqizimi i zërit femëror në letërsi dhe luftimi i dhunës ndaj gruas.
Në kumtesën e saj, shkrimtarja Lindita Tahiri theksoi se emërimi i iniciativës si ‘Britma e gruas’ kujton stereotipin klasik të personazheve femra në letërsinë kanonike, të cilat shfaqeshin ose si gra engjëllore ose si gra të marra.
“Madje, edhe vetë ideja e Lëvizjes Ndërkombëtare të Grave Poete nënkupton ndarjen e letërsisë mbi baza gjinore, dhe ndarjen e një aktivizmi shumë të rëndësishëm kundër dhunës – po ashtu mbi baza gjinore”, theksoi Tahiri, derisa përmendi disa nga stereotipat gjinorë dhe citoi thëniet e disa autorëve, që dëshmojnë për ekzistimin dhe për vazhdimësinë e këtyre stereotipave.
Sipas saj, pabarazia gjinore ka një pushtet kognitiv, që mbështetet në përvetësimin e automatizuar të normave të caktuara gjinore, dhe që manifestohet në veprimet dhe rutinën tonë të përditshme.
“Prandaj, praninë e zërit të femrës në letërsi më shumë e shoh si vetëdijesim sesa si britmë; e shoh si një zë që e ndryshon perspektivën e atyre që lexojnë ndaj asaj që e lexojnë; e shoh si njëlloj diskursi politik, që i kundërvihet mendësisë patriarkale dhe dogmatike”, u shpreh Tahiri, derisa shtoi se perspektivën femërore në letërsi e sheh si nxitje për një lexues aktiv i cili iu reziston formulave të gatshme, gjegjësisht, për një lexues që nuk është vetëm konsumues pasiv i ideologjive të gatshme.
Ndërkaq, poetja dhe publicistja, Naime Beqiraj, tha se pak gjëra kanë ndryshuar që nga koha kur ajo filloi të shkruajë poezi - para 30 viteve. Ajo akuzoi edhe poetët meshkuj, të cilët, sipas saj, mundohen të krijojnë autoritete të paqena letrare.
“Përsëri jemi pak poete, por ndryshe nga të të tetëdhjetat, nuk mund të rri indiferente e të mos them se kemi aq pak poetë (burra) që shkruajnë bukur. Përsëri, ka burra që përpiqen të krijojnë autoritete të paqena letrare”, theksoi Beqiraj. Ajo ndërkohë thumboi gjininë e kundërt, meqenëse, siç u shpreh, çikat e gratë që shkruajnë në juritë letrare i vendosin vetëm sa për strukturë.
Pas kumtesave të lexuara, me poezitë e tyre u paraqitën Flora Brovina, Edi Shukriu, Shukrije Gashi, Blerina Rogova–Gaxha, Fahredin Shehu, Xheraldina Vula, Kujtim Paçaku, Nerimane Kamberi dhe Trina Gojani.
Aktiviteti i dytë ‘Britma e gruas’ organizohet nën drejtimin e PEN Qendrës së Kosovës, dhe i kushtohet aktivistes pakistaneze, Malala Yousafzai.

“Britma e gruas” për zërin e femrës në poezi

Publikuar: 13.03.2013 - 10:16
Prishtinë, 13 mars - Në Kosovë dëgjohet pak zëri i femrës në poezi. Por të hënën ai u dëgjua më shumë se zakonisht. Me qëllimin për të avancuar letërsinë, PEN Qendra e Kosovës për herë të dytë iu bashkua botës në shënimin e Festivalit Ndërkombëtar të Poezisë së Lëvizjes Ndërkombëtare të Grave Poete. Në botë ky aktivitet shënohet për herë të tretë, me më shumë se 90 aktivitete. Poetet kosovare u bënë bashkë në ambientet e Bibliotekës Kombëtare e Universitare të Kosovës për të lexuar poezi dhe për t’u përgjigjur në pyetjen se sa dëgjohet zëri i femrës në letërsi.

E para që e hapi aktivitetin e titulluar “Britma e gruas” ishte poetesha Ilire Zajmi, e cila zbërtheu qëllimin e festivalit ndërkombëtar që u dedikohet grave poete.

“Festivali ka për qëllim avancimin e letërsisë femërore, ngritjen e zërit për poetet femra dhe mbrojtjen e të drejtave të tyre. Në botë shënohet me 90 aktivitete”, ka thënë Zajmi.

“Aktiviteti i dytë në kuadër të festivalit do të mbahet në Pejë, në fund të muajit”, ka shtuar ajo.

Studiuesja Lindita Tahiri ka thënë se iniciativa “Britma e gruas” me vetë emërtimin e kujton stereotipin klasik të personazheve femra në letërsinë kanonike. Sipas saj, zëri i femrës në letërsi duhet të jetë më prezent dhe për këtë duhet vetëdijesim.

“Prandaj, praninë e zërit të femrës në letërsi më shumë e shoh si vetëdijesim sesa si britmë, e shoh si një zë që e ndryshon perspektivën e atyre që lexojnë ndaj asaj që e lexojnë, e shoh si një lloj të caktuar të diskursit politik, që i kundërvihet mendësisë patriarkale dhe dogmatike”, ka thënë Tahiri, derisa ka shtuar se perspektivën femërore në letërsi e sheh si një nxitje për lexuesit që nuk janë konsumatorë të ideologjive të gatshme.

Poetesha Naime Beqiraj ka ka thënë se sa i përket prezencës së femrës në letërsi, në 30 vjetët e fundit nuk ka pasur shumë ndryshime.

“Pak gjëra kanë ndyshuar qysh para 30 vjetësh kur nisa të botoja poezi. Përsëri pak poete jemi, por ndryshe prej viteve ‘80, nuk mund të rri indiferente e të mos them se kemi aq pak poetë (burra) që shkruajnë bukur. Përsëri, çikat e gratë që shkruajnë i vendosin sa për strukturë në juritë letrare”, ka thënë Beqiraj.

Ajo ka thënë se Kosovës tashmë i mungojnë dy poete të mira, Feime Selimi dhe Hida Halimi.

“As Hida, as Feimja, këto ikona të lirikës klithëse, nuk kanë qenë krejt vajtojce, por britmat e tyre kanë qenë femërore, origjinale, magji poetike”, ka shtuar ajo.

Në kuadër të aktivitetit “Britma e gruas”, poezi kanë lexuar Edi Shkuriu, Xheraldina Vula, Blerina Rogova - Gaxha, Kujtim Paçaku, Fahredin Shehu etj. Aktiviteti është shoqëruar edhe me pika muzikore të inerpretuara nga Lule Ballata, në pikolo.
www.koha.net
 

Codex Episoda 12 Ilire Zajmi 14 08 2021